தொற்றின் காரணமாக, நுரையீரலில் உள்ள சிறிய காற்றுப்பாதைகள் வீங்கி, அதிக சளி (பிசுபிசுப்பான திரவம்) உருவாக்கும். சளி காற்றுப்பாதைகளைத் தடுத்து, உடலுக்குள் செல்லக்கூடிய ஆக்சிஜனின் அளவைக் குறைக்கிறது.
நிமோனியா பெரும்பாலும் சளி போன்ற மற்றொரு சுவாசக் கோளாறுக்குப் பிறகு வருகிறது. சில நேரங்களில் நிமோனியாவுடன் தொடர்புடைய சிக்கல்கள் உருவாகலாம், ஆனால் இவை பொதுவானவை அல்ல, மேலும் உங்கள் மருத்துவர் உங்கள் குழந்தையை இவற்றிற்காக கண்காணிப்பார்.
நிமோனியாவின் அறிகுறிகள் மற்றும் அடையாளங்கள் எவை?
நிமோனியாவின் அறிகுறிகள் மற்றும் அடையாளங்கள் உங்கள் குழந்தையின் வயது மற்றும் நிமோனியாவினை ஏற்படுத்தும் காரணத்தைப் பொறுத்து மாறுபடும். குழந்தைகளுக்கு பெரும்பாலும் கீழுள்ள ஒன்று அல்லது அதற்கு மேற்பட்டவை இருக்கும்:
* அதிக காய்ச்சல்
* வேகமான மற்றும்/அல்லது கடினமான சுவாசம் – உங்கள் குழந்தையின் சுவாசம் கடினமாகிவிடும், மேலும் அவர்கள் சுவாசிக்கும்போது விலா எலும்புகள் அல்லது கழுத்தின் கீழ் தோல் ‘உள்ளே இழுக்கப்படுவதை’ அல்லது நாசி துவாரங்கள் விரிவடைவதை நீங்கள் காணலாம்; சிறிய குழந்தைகள் சுவாசிக்கும்போது தலையை ஆட்டலாம்
* இருமல்
* எரிச்சல் அல்லது வழக்கத்தை விட சோர்வாக இருப்பது
* மார்பில் வலி, குறிப்பாக இருமும்போது
* வயிற்றுவலி
எப்போது மருத்துவரை பார்க்க வேண்டும்?
உங்கள் குழந்தைக்கு நிமோனியா இருப்பதாக நீங்கள் நினைத்தால், உங்கள் மருத்துவரை நீங்கள் பார்க்க வேண்டும். பொதுவாக உங்கள் குழந்தைக்கு எந்த சோதனையும் தேவையில்லை, ஆனால் சில சமயங்களில் மருத்துவர் நிமோனியாவைக் கண்டறிய இரத்தப் பரிசோதனை அல்லது எக்ஸ்ரே கதிர்ப்படம் எடுக்கச் சொல்வார்.
நிமோனியாவுக்கான சிகிச்சை முறைகள்
பாக்டீரியா நிமோனியா Bacterial Pneumonia:
உங்கள் குழந்தையின் நிமோனியா பாக்டீரியாவால் ஏற்பட்டால், அவர்களுக்கு நுண்ணுயிர்க்கொல்லிகள் Antibiotics பரிந்துரைக்கப்படும். லேசான பாக்டீரியா நிமோனியா நோய் நிலையில், இந்த மருந்தை வீட்டில் வாய் வழியாக எடுத்துக்கொள்ளலாம். பாக்டீரியா நிமோனியா உள்ள குழந்தைகள் பொதுவாக நுண்ணுயிர்க்கொல்லிகள் Antibiotics தொடங்கிய 48 மணி நேரத்திற்குள் குணமடைவார்கள். உங்கள் குழந்தை மிகவும் நன்றாக இருப்பதாகத் தோன்றினாலும், நுண்ணுயிர்க்கொல்லிகளின் Antibiotics முழுமையான அளவையும் முடிப்பது மிகவும் முக்கியம். சிகிச்சை 3 முதல் 7 நாட்கள் வரை தொடரும். சிகிச்சைக்குப் பிறகு உங்கள் குழந்தை மூன்று வாரங்கள் வரை இருமல் தொடரலாம், ஆனால் அவர்கள் மற்றபடி குணமடைந்து கொண்டிருந்தால் இது பற்றி கவலைப்பட தேவையில்லை.
பாக்டீரியா நிமோனியாவுடன் மிகவும் உடல்நிலை சரியில்லாமல் இருக்கும் குழந்தைகள், நாளத்தினூடாக (IV சிகிச்சை) நேரடியாக நரம்பில் நுண்ணுயிர்க்கொல்லிகள் Antibiotics கொடுக்க மருத்துவமனையில் அனுமதிக்கப்படலாம். சில குழந்தைகளுக்கு ஆக்ஸிஜன் அல்லது கூடுதல் திரவங்கள் கூட தேவைப்படலாம்.
வைரல் நிமோனியா Viral Pneumonia :
வைரல் நிமோனியா பொதுவாக பாக்டீரியா நிமோனியாவை விட கடுமையானது அல்ல. இருப்பினும், நோய் நிலையில் இருந்து மீண்டு வருவது மெதுவாக இருக்கலாம், நான்கு வாரங்கள் வரை ஆகலாம். நுண்ணுயிர்க்கொல்லிகள் Antibiotics வைரஸ்களை குணப்படுத்தாது மற்றும் வைரல் நிமோனியாவுக்கு கொடுக்கப்படுவதில்லை.
வீட்டில் பராமரிப்பு
மருத்துவர் உங்கள் குழந்தைக்கு லேசான நிமோனியா இருப்பதாகக் கண்டறிந்த பிறகு, நீங்கள் வழக்கம் போல அவர்களை வீட்டில் கவனித்துக் கொள்ளலாம்.
* உங்கள் குழந்தைக்கு நிறைய ஓய்வு தேவைப்படும்.
* நீரிழப்பைத் தடுக்க உங்கள் குழந்தைக்கு அடிக்கடி திரவங்கள் கொடுப்பது முக்கியம். சிறிய அளவு தண்ணீர் அடிக்கடி கொடுங்கள், மேலும் குழந்தைகளுக்கு தாய்ப்பால் அல்லது பெட்டிப்பாலை அடிக்கடி கொடுங்கள்.
* நிமோனியா இருக்கும்போது பெரும்பாலான குழந்தைகள் சாப்பிட மறுப்பார்கள். அவர்கள் திரவங்கள் குடிக்கிற வரை இது ஒரு பிரச்சனையல்ல.
* நுண்ணுயிர்க்கொல்லிகள் Antibiotics பரிந்துரைக்கப்பட்டிருந்தால், அவற்றை வழங்குவதற்கான மருத்துவரின் அறிவுறுத்தல்களைப் பின்பற்றவும்.
* சிறுவர்களுக்கு முற்றிலும் தட்டையாகப் படுப்பதற்குப் பதிலாக, இரண்டு தலையணைகளில் சாய்ந்து தூங்குவது மிகவும் வசதியாக இருக்கும்.
* உங்கள் குழந்தைக்கு மார்பு வலி அல்லது காய்ச்சல் இருந்தால் மற்றும் உடல்நிலை சரியில்லாமல் இருந்தால், அவர்களுக்கு பாராசிட்டமால் panadol போன்ற வலி நிவாரணம் தேவைப்படலாம். மூன்று மாதங்களுக்குக் குறைவான குழந்தைகளுக்கு அல்லது நீரிழப்புடன் இருக்கும் குழந்தைகளுக்கு வேறு வலிநிவாரணிகள் கொடுக்க வேண்டாம். குழந்தைகளுக்கு ஆஸ்பிரின் கொடுக்காதீர்கள்.
* இருமல் மருந்துகள் கொடுக்க வேண்டாம். அவை நிமோனியா உள்ள குழந்தைகளுக்கு உதவாது.
* வீட்டிலோ அல்லது உங்கள் குழந்தைக்கு அருகிலோ யாரும் புகைக்க அனுமதிக்காதீர்கள்.
* உங்கள் குழந்தையின் குணமடைதலைப் பார்க்க நீங்கள் மீண்டும் செல்ல வேண்டுமா என்று உங்கள் மருத்துவர் உங்களுக்குச் சொல்வார்.
உங்கள் குழந்தைக்கு கீழுள்ள நிமோனியா அறிகுறிகள் இருந்தால், நீங்கள் உங்கள் மருத்துவரைப் பார்க்க வேண்டும்:
* அவர்களின் சுவாசம் மிகவும் கடினமாகிவிட்டால், அல்லது அவர்கள் சுவாசிக்கும்போது உறுமல் (grunt) உருவாகினால்
* அவர்கள் மிகவும் மயக்கமாக அல்லது தூக்கமாகிவிட்டால், அல்லது எழுப்ப கடினமாக இருந்தால்
* அவர்கள் வாந்தி எடுக்கத் தொடங்கினால் மற்றும் அதிகமாக குடிக்க முடியாவிட்டால்
* நோய்வாய்ப்பட்டிருக்கும்போது எந்த கட்டத்திலாவது உங்கள் குழந்தையைப் பற்றி நீங்கள் கவலைப்பட்டால் அல்லது வேறு கேள்விகள் இருந்தால்.
நினைவில் கொள்ள வேண்டிய முக்கிய புள்ளிகள்
* உங்கள் குழந்தைக்கு நிமோனியா இருப்பதாக நீங்கள் நினைத்தால், அவர்களை உங்கள் மருத்துவரிடம் அழைத்துச் செல்ல வேண்டும்.
* உங்கள் குழந்தைக்கு நிமோனியா இருந்தால், அவர்கள் ஓய்வெடுக்க வேண்டும் மற்றும் நீரிழப்பைத் தடுக்க அடிக்கடி சிறிய அளவில் திரவம் குடிக்க வேண்டும்.
* நுண்ணுயிர்க்கொல்லிகள் Antibiotics பரிந்துரைக்கப்பட்டிருந்தால், உங்கள் குழந்தை நுண்ணுயிர்க்கொல்லிகளின் Antibiotics முழுமையான அளவை முடிப்பது மிகவும் முக்கியம்.
Dr Vishnu Sivapatham
Consultant Paediatrician
Teaching Hospital Batticaloa
No comments:
Post a Comment